မှန်မှာ ထောင်ဗျယ် ဖတ်ဖို့ အိပ်ရာထ၀တ္ထု (၃)

ပြောက်ကျားတပ်ထဲကနီတောထဲကို လမ်းလျှောက်ဖြတ်လာပြီးရေအခါ မိုးဂျောက်စွာ ညောင်းညောင်းနန့် တောလမ်းလေးက အပင်ချေ တစ်ပင်မှာ မှေးခနဲ့တရီး အိပ်ဖို့ကြံရေ။ အိပ်မောက မကျသိမ့် တိရိစ္ဆာန်နှစ်ကောင်က ဆူဗျယ်လမ်းလျှောက်လာပြီး သူအိပ်နိန်ရေ အပင်တစ်ဖက်မှာ ငြင်းခုန်နိန်ကတ်တေ။ မိုးဂျောက်က မှတ်တေ ဇာပိုင်ကောင်တိလေးချင့်။ အိပ်ဖို့ကမရ။ သူစိတ်တိုပနာ လိုက်ကြည့်ရေ။ ယား.. ယုန်နန့် လိပ် မနားယေ…
ယုန်နန့်လိပ် ရန်ဖြစ်နိန်ကတ်စွာက တခြားကြောင့်က မဟုတ်…အပြီးပြိုင်ကတ်စွာ ပထမဆုံးပွဲမှာ ယုန်က အိပ်နိန်လို့ရှုံးရေ။ နောက်တစ်ပွဲမှာခါ မအိပ်တေယုန်က နိုင်လားရေ။ မကျေနပ်တေ လိပ်က ရီကို ဖြတ်ပြီး ပြိုင်ခိုင်းခါ လိပ်ရာနိူင်ရေ။ကုန်းလမ်းသပ်သပ် ရီလမ်းသပ်သပ် ကိုယ့်လမ်းနန့်ကိုယ် ပြိုင်ရေအခေါက်မှာတော့ တစ်ကောင်ချင်းရောက်လားရေ ပန်းတိုင်မတူခါ အသူနိုင်မှန်းမသိ။ဆုံးဖြတ်ရ ခက်ပနာ ယင်းပိုင်နန့် ငြင်းနိန်ကတ်တေ။ ယင်းဟင့်ကို မိုးဂျောက်က အကြောင်းစုံ မီးကြည့်ခါမှ သိလားရေ။
“ နိန်ဦးသိမ့် ငါကူညီမေ...” ဆိုပြီး
မိုးဂျောက်စွာ ယုန်နဲ့လိပ်ကို ခေါ်ဗျယ်ပြောရေ။
``မင်းရို့နှစ်ကောင်စွာ တိရိစ္ဆာန်တိ ဖြစ်ကေလေ့.. အငြိမ်မနီ ဟိုပြိုင်ဒေပြိုင်နန့်။ အချေတိမှာလေ့ အလကားနီယင်း သင်ဖို့စာတစ်ပုဒ်တိုးလားရေ… တစ်ခါနန့်လေ့ မကျီ နှစ်ခါနန့်လေ မကျီ အချေတိလေ ခေါင်းရှုပ်နိန်ဗျယ် … ယင်းတွက်နန့် ငါပြောပိုင်လုပ် ”
ဆိုဗျယ်ပြောရေ သူကဗျယ် ဆက်ပနာ
``မင်းရို့နှစ်ကောင်မှာ ...တစ်ကောင်က ယုန်၊ တစ်ကောင်က လိပ်။ မတူရေ ပစ္စည်းနှစ်ခုကို ညီမျှခြင်းချလို့ တစ်ခါလေ့ မကျလို့မှတ်ထား၊ ပန်းသီးနန့် လိမ္မော်သီး ဇာကောင်းလေ မီးကေ၊ အရူးတိရာ တစ်လုံးလုံးကို ရွီးပြီးဖြေကတ်လိမ့်မယ်။ ယကေလေ့ ငါပျင်မေရအောင်`` ဆိုပြီး ပြောရေ။
မိုးဂျောက်က ပထမဆုံး လိပ်နောက်ကုန်းကို ချွတ်ခိုင်းရေ။ ယပြီးကေ လွတ်လွတ်လပ်လပ်ပြီးနီရေ ယုန်မှာ လိပ်နောက်ကုန်းကို တပ်ပနာ နှစ်ကောင်လုံးကို တောလမ်းမှာ ပြီးခိုင်းရေ။ အေတစ်ခေါက်က ယုန်ကလေ့ မအိပ်ပဲ ပြေးရေ။ ယကေလေ့ လိပ်နေက်ကုန်းက လီးရေခါ တဖြည်းဖြည်းရာလားရရေ။ လိပ်ကလေ့ နောက်ကုန်းမပါခါ အယင်ကထက်စာကေ ကောင်း ပေါ့ပေါ့ပါးပေါ့ပါး ပြေးနိုင်ရေ။ ယပိုင်နန့်နှစ်ကောင်လုံး ပြေးနှုန်းတူလားပြီးကေ မိုးဂျောက်စောင့်နိန်ရေ ပန်းတိုင်ကို တတူတူပန်းဝင်လားရေလတ်။
အဟင့် ယကေလေ့ လိပ်စွာ အထွန့်တက်ချင်ရေ ``ကုန်းမှာတော့ခါ တူဗျယ် ရီမှာဆိုကေ ငါနိုင်ချင်နိုင်ဖို့´´ ဆိုပနာ ပြောရေ။
``ယကေ ကောင်းဗျယ် ရီကိုလားမေ ယင်းမှာ ငါပြောပိုင်ဆက်ပြိုင်ဆိုပြီး မိုးဂျောက်က ပြောခါ ယုန်စွာကောင်းမျက်နှာချေ ငယ်လားရေ။ ရီထဲမှာ အေတိုင်း အလွတ်ကူးကေအောင်မနိုင်စွာ။ အခု သူပါးမှာ လိပ်နောက်ကုန်းနန့်၊ လိပ်မှာက ဗလာ၊ လိပ်ရာ နိုင်ဖို့ဆိုဗျယ်စဉ်းစားမိပြီး မျက်နှာချေငယ်လားရေ။ ယကေလေ့ ဒိုင်တင်ထားရေ မိုးဂျောက်ကိုယ်တိုင်က သဘောတူနိန်ခါမပြောသာ။ မိုးဂျောက်ခေါ်လားစော် နေရာကိုရာခေါင်းချေ ငိုက်စိုက်ငိုက်စိုက် နန့်ပါလားရ။ လိပ်ကတော့နောက်ကုန်းလေ့မဟိ သူနိုင်ဗျယ်ဆိုပြီး မြောက်ကြွမြောက်ကြွ ။
သူရို့သုံးယောက်လုံးမြစ်ဆိပ်တစ်နေရာမှာ ရပ်တေ။
``မင်းရို့နှစ်ကောင်အေမှာ စပြီးပြိုင်ရဖို့..´´ ဆိုပြီးကေ အယှိန်နန့်စီးနိန်ရေ ချောင်းမှာ လိပ်နောက်ကုန်းနန့်ယုန်ကို ပက်လက်ရေလတ်။ ယပြီးကေ လိပ်ကိုပါ ရေထဲချပြီး နှစ်ကောင်ကိုပြိုင်ခိုင်းရေ ရီက အယှိန်နဲ့လားနီရေဆိုခါ ယုန်က လိပ်ခွံပက်လက်မှာ ကူးစရာမလိုပဲ အယှိန်နဲ့လားနီရေ။ လိပ်ကလေ့ နောက်ကုန်းခွံမပါပဲ ကူးရေခါကျင့်သားမရကေလေ့ ရေသတ္တ၀ါဖြစ်လို့ ယင်အောင်ကူရေအတွက်နန့် နှစ်ကောင်သား ရီထဲမှာလေ အယင်နှုန်းတူပနာ တတူတူပန်းဝင်လားရေလတ်။
ရီမှာပါ ကုန်းမှာပါ တတူတူပန်းဝင်လားရေ ယုန်နန့်လိပ်လေ့ နောက်တစ်ခါ အပြီးမပြိုင်ဗျယ်ဆိုရေ ဂတိကို ပြုဗျယ် မိုးဂျောက်ကို ကောင်းချီးကျူးကတ်တေလတ်။ ပြဿနာတိပြီးလားလို့ မိုးဂျောက်ပင်ပန်းလာပြီး အိပ်ချင်စိတ်လေ့ ပျောက်လားပနာ လားရဖို့ ခရီးကို ဆက်လားခပါရေ။
အားလုံးကိုကျေးဇူးတင်ပါသည်။
ညီစု(၁၊၃၊၂၀၀၉)

မှန်ထဲမှာထောင်ဗျယ် ဖတ်ဖို့ အိပ်ရာထ၀တ္ထု(၂)

တခါကလေ့ ခြီရှည်ရေ မိုးဂျောက်စွာ ကရင်ပြည်ကို ရောက်လားပါလတ်။ ကားစီးယင်းနန့်လမ်းမှာ ပြောက်ကျားတိနန့်တွိပနာ ယင်းပြောက်ကျားတိက ကားထက်မှာပါရေ ကရင်မဟုတ်တေ လေးယောက်ကို ဖမ်းလာပါရေ။ ယင်းထဲမှာ အင်္ဂလိပ်တစ်ယောက်၊ တရုတ်တစ်ယောက်၊ ကုလားတစ်ယောက်၊ မိုးဂျောက်ကတော့ သိရေအတိုင်း ရခိုင်။
ပြောက်ကျားတပ်ကို ရောက်ရောက်ချင်းပင် ယင်းတပ်က ပြောက်ကျားဗိုလ်စွာ ထမင်းစားပြီးခါစ၊ (ပြောရဖို့သိမ့် ယင်းဗိုလ်စွာကကောင်းဆိုးရေလတ်။) ဖမ်းလာသမျှလူမျိုးခြားကို စိတ်မချင်ကေ မချင်ပိုင် သတ်ပစ်တတ်တော။ ကြောင်က ကြွက်ကို က၀တ်ပိုင် ကစတ်တတ်တေ။
ယပိုင်နန့် ဖမ်းလာစွာ လူလေးယောက်ကိုတွိမှာ ပြောက်ကျားဗိုလ်စွာအကြံရဗျယ်။ လူလေးယောက်ကိုခေါ်ဗျယ် မီးရေလတ်။
``မင်းရို့လေးယောက်ရပ်၊ ယပြီးကေ ငါမီးစွာကိုဖြေ…´´
အားလုံးက အံ့သြပြီးကြောက်လန့်နီကတ်တေ။
ဗိုလ်ကြီးက ပါးစပ်ဟပနာ
``ငါအခုနာကမှ ထမင်းစားပြီးသိမ့် ပါးစပ်က အနံ့ကို အနံ့ခံရဖို့… နံမနံငါ့ကိုပြော`` ဆိုပြီးပြောရေ။
ပထမဆုံးအင်္ဂလိပ်အလှည့် ဖြစ်ချင်စွာက ယင်းအင်္ဂလိပ်က မစဉ်းစား ပြောက်ကျားဗိုလ် ပါးစ ဟသိမ့်..။နံစွာကိုး
``နံရေ..နံရေ´´လို့ ပြောလိုက်တေ…
ဗိုလ်ကြီးက ``အေ အင်္ဂလိပ် ငါ့ကို အားမနာ ပါးမနာ``ဆိုဗျယ် သနတ်တစ်ချက်တည်း ပစ်သတ်ပစ်တေ။ အေတစ်ခါ တရုတ်အလှည့်။ တရုတ်ကလေ့ မစဉ်းစားဗျယ် အမှန်အတိုင်းပြောလေ့ အသတ်ခံရဖို့ဆိုဗျယ် ဗိုလ်ကြီး ပါးစဟမီးရေအခါ
``မွှီးရေ မွှီးရေ ´´ ဆိုပြီးမြောက်တေ။ယေမှာ ဗိုလ်ကြီးက ``အေ တရုတ်ငါ့ကို အချေထင်လာ ယာ လားလီ´´ ဆိုဗျယ် သနတ်နန့်ပစ်သတ်လိုက်ပြန်ရေ..
အခုတစ်ခေါက် ကုလား အလှည့်၊ ကုလားက လူကြည့်ရစွာဂျလည်နန့်တူရေ ဗိုလ်ကြီးကလေ့ တချချေပင်မစောင့် ကုလားကို ထပ်မီးရေ။ ပါးစပ်ကို ဟလိုက်တေ။ ကုလားက မျက်နှာကို တည်ပနာ
``အေ နိန့် နှာစီးနီပါရေ ဗိုလ်ကြီး´´
ယေမှာ ဗိုလ်ကြီးက ဂျလည်ကျချင်ရေ ငါမီစွာကိုမဖြေ ယာလားလီယား အရာတကောင် ဆိုဗျယ် သနတ်နန့်ပစ်သတ်ပြန်ရေ။
အခုနောက်ဆုံး မိုးဂျောက်အလှည့်မှာလေ့ ဗိုလ်ကြီးက ပါးစဟပီးပြန်ရေ မိုးဂျောက်က ပါးစက အနံ့ကို မသျှုခင် စိတ်ပါလက်ပါ ရင်းရင်းနှီးနှီး ဗိုလ်ကြီးကိုပြုံးပြပါရေ…
ယပြီးကေ စကားတိကို တစ်ခွန်းချင်း ပြောချလိုက်တေ..
``ဇာသူပိုင် အနံ့ရှူရပါဖို့လေ ဗိုလ်ကြီး…
``ဗိုလ်ကြီးကို ချစ်သူပိုင်လား…´´
``ဗိုလ်ကြီး ရန်သူပိုင်လား…´´
``ဗိုလ်ကြီုး တပည့်ပိုင်ပါလား…´´
ချစ်တေလူ တစ်ယောက် အနိန်နန့်ှ သျှုခါ ချစ်တေစိတ်နန့် သျှုလို့ ဇာအနံ့ပင်ဖြစ်ဖြစ်မွှီးပါဖို့… မုန်းရေလူတစ်ယောက် အနေနန့် သျှုကေတော့ အနံ့မွှီးမွှီး မမွှီးမွှီး နံပါဖို့… လက်အောင်ငယ်သားပိုင်သျှုရေခါ တော့ကေ.. နံနံမွှီးမွှီးပွင့်ပွင့်လင်းလင်း မပြောရဲလို့ နှာစေးရပါဖို့…
မိုးဂျောက်စကားဆုံးခါ ပြောက်ကျားဗိုလ်ကြီးစွာ ကောင်းကျေနပ်ပနာရယ်ပါရေ။ ယပြီးကေ မိုးဂျောက်ကို ချိုင်ထားရေကြိုးတိကိုဖြီပီးလိုက်ပြီးကေ။ အိမ်ပြန်လက်ဆောင် ဒင်္ဂါးတဆ်ိချေပါ ပီးလိုက်ပါရေ မိုးဂျောက်လေ ပြောက်ကျားဗိုလ်ကို နှုတ်ဆက်ဗျယ် ယင်းတပ်ထဲက လမ်းလျှောက်ယင်းထွက်လားခပါရေ..
အားလုံးကို ကျေးဇူးတင်ပါရေ
ညီစု
(၁၊၃၊၂၀၀၉)

မှန်မာ ထောင်ဗျယ် ဖတ်ဖို့ အိပ်ရာထ၀တ္ထု (၁)

တခါကခါ ရခိုင်ပြည်မှာ မိုးဂျောက်လို့ခေါ်ရေ ကလေချေတစ်ယောက်ရှိပါရေလတ်။ မိုးဂျောက်ဆိုစွာ သူ့နာမေ အရင်းတော့ခါမဟုတ်ပါ၊ ဖြစ်စွာကအေပိုင် သူက လူများက အရဆှိုိ၊ သူကတောင်၊ သူများကမြောက်ဆိုကေ သူက အနောက်၊ သူများက ထိုင်ကေ သူကပြီးရေ သူများကပြီးကေ သူက လဲနီရေ။ သူက လူများနဲ့ ဆန့်ကျင်နီစွာတော့ခါမဟုတ် ကန့်လန့်တိုက်လွန်းပိုင်ဖြစ်အားကြီးလို့ မိုးဂျောက်ဆိုပြီး ခေါ်ခံရစွာ။
တစ်နေ့သူစွာ ဗမာပြည်ကို အလည်လားပါရေလတ်။ အလုပ်ရှာယင်း ရှာယင်းနန့် ဖေ့သာတိ ပါသမျှ အားလုံးကုန်လားခါ ဗမာပြည်က စကားတောင်စား အလုပ်လုပ်ခရေ သူဌေးပါ့မာလားပြီး အမှုထမ်း ဝင်လုပ်ဖို့ ဆိုပနာ ၀င်လုပ်ပါရေ။ ယင်းသူဌေးအိမ်မှာ ကောင်းကောင်းကြိုးစား အလုပ်လုပ်ခါ သူဌေးက ကောင်းသဘောကျရေ။
တစ်နိန့် မိုးဂျောက်လေ့ညီးငွေ့ပြီး အလုပ်ထွက်ချင်ခါ ပီးမထွက်ဗျယ်။ ကြိုးစားရေ မိုးဂျောက်ကို အလုပ်မထွက်စီချင်ခါ သူဌေးစွာ ညစ်ဖို့ကြိုးစားပါဗျယ်။ အယင်စာရေးနောက်လိုက် စကားတောင်စားက သူအလုပ်မထွက်ချင်ရေခါက ပြောခရေအတိုင်းအလုပ်ရဖို့ဆိုပြီး အကြံရရေဗျယ် ချက်ချင်းမိုးဂျောက်ကို ခေါ်ပြီးပြောပါရေလတ်။
``ဝေး လူမောင်… အာကာမှာ လနှစ်စင်း တွိမှ မင်းကို အလုပ်ထွက်ခွင့်ပီးဖို့…´´
သူကပင်ဆက်ပြီးကေပြောရေ
``ယကေလေ့ စကားတောင်စားကို ငါပြခရေပိုင် ရီခွက်ထဲက လကို ပြလို့မရနန်း´´ဆိုပနာ ကောင်းကျေနပ်ဗျယ် အားရပါးရပြောရေ။ သူ့အကြံမှာ မိုးဂျောက်မကြံနိုင်ဗျယ် သူ့ပါ့မှာ အလုပ်ဆက်လို့ လုပ်ကိုလုပ်ရဖို့ဗျယ်ဆိုပြီး သူ့ကိုသူကောင်းကျေနပ်နီပါရေ။
ယေခါ မိုးဂျောက်က မတုန်လှုပ်ပဲ ပြောပါရေ
``သူဌေး ယကေ ညခါဖက်လာလတ်မေ…´´
အခုလား လားအိပ်လိုက်ပါဦးမေပြောဗျယ် တွက်ထားခရေ။
ညဖက်ခါ ရောက်ခါ သူ့ကိုယ်သူကောင်းကျေနပ်နီရေ သူဌေးစွာ ကွပ်ပျစ်မှာ ထိုင်ပနာ ရီနွိးသောက်နီရေ။ ယင်းအချိန် မိုးဂျောက် ရောက်လာခါရေ။ အထုပ်တိပါ တပါတည်းပါလတ်တေ။ သူဌေးက အံသြတကြီးနန့်
``သူဌေး ကျွန်တော်လားဖို့ဗျယ်…´´
``ဇာမှာလေ လနှစ်စင်းဝါ…´´
မိုးဂျောက်က မသိမသာချေ ပြုံးဗျယ် သူ့လက်ညှိုးကို သူဌေးနှစ်ခေါင်းရှိတည့်တည့် မျက်စိနှစ်လုံးကြားမှ ထားပြီး
``သူဌေး လက်ညှိုးကို ကြည့်ပါ။ လက်ညှိုးမှာ မျက်စိထားပြီး သာနီရေ လ ကိုမသိမသာကြည့် ဇာတွေလေ…´´
သူဌေးလေ့ ဂျီဝိဂျီဝါဖြစ်ဗျယ်လုက်ကြည့်ရေ မိုးဂျောက်ပြောရေအတိုင်းလုပ်မှ အာကာမှာ လနှစ်စင်းသာနီစွာ သူတွေ့လားရေ။
သူဌေးလေ့ မိုင်လားပြီး ခါးပိုက်အိတ်ထဲက ဒင်္ဂါးတိထုတ်ဗျယ် မိုးဂျောက်ကို ပီးလိုက်ရေလတ်။ မိုးဂျောက်လေ့ သူဌေးပီးစွာကိုယူ၊ သူဌေးကို နှုတ်ဆက်ဗျယ် ယင်းမှာက ထွက်လာခရေလတ်။
အားလုံးကို ကျေးဇူးတင်ပါရေ
ညီစု
(၁၊၃၊၂၀၀၉)